أن تحكم ليبيا بالدبوس وبالرصاص والمسواق وبكلاشن الارهاب الثوري المبرمج زي ما تبّي لأكثر من 41 عام.. عام ينطح عام..
أن تصبح ليبيا مزرعة خاصة بيك وبعيلتك تعطي فيها لصغارك ولطبالينك كل اللي يبوه ويبرطعو فيها كيف ما يبو وتمنع اساسيات الحياة البشرية الحره الكريمة عن الثانيين..
أن تستمتع بالابهه وبالسلطه وبفلوس وموارد ليبيا وتبني مجد خاص بيك وماحدش يقدر يناقشك في الطريقه اللي تسيّر بيها في امور حوالي ستة ملايين من البشر..
لمّا توصل لقمة الابداع البشري في زرع الفتن والقتل الجماعي وحبك المؤامرات وتزييف الحقائق..
ان لا تسمح بطلوع اي صوت فوق صوتك وما تسمحش لأي كائن من كان بأنه يشك في نياتك ويفضح عمايلك وعمايل كلابك الدمويه.. وتمنع اي حد من انه يذكّرك بتاريخ محاولاتك ومغامراتك الفاشله وانجازاتك الهزيله ومقولاتك البايخه..
أن تصبح بكل ما فيك من شذوذ وجينات عدوانيه ومقت وحقد وكراهيه للشعب الليبي وتصبح دكتاتور ما يتريحش الا على صوت البارود وانغام الفتنه والقتل والتدمير والارهاب والهتافات الثوريه المخرومه وصراخ الاطفال والنازحين للخيام الخاويه عند الجيران..
ان تفقد كل مشاعرك واحاسيسك وتضيع بين رغبتك في ان تكون ملك او ان تكون رب جديد لليبيا..
أن تدمر داخل ليبيا وتعمر برّه منها..
أن تفطن الى أن الشعب فاق بيك وعرف كمية قناطير الكراهيه اللي موجوده في داخلك.. وتكتشف أن الشعب الغلبان اكتشف كل طروحاتك وخوازيقك والاعيبك ومؤامراتك وقداش نيتك خايبه.. وتبدي فيهم رحي وسحن بالصواريخ والرصاص المضاد للطيارات..
لمّا تتأكد على أرض الواقع أنه معادش فيه أي حاجه ممكن اتديرها بيش تسترك او تخلّي الليبيين يسامحوك على اللي درته فيهم.. وتعرف أنه اكثر من 90 في الميه من الليبيين والليبيات يكرهو حتى سماع اسمك وصوتك او يشوفو صورتك..
ان تتحول الى جرذ اهبل فاقد للسيطره على اعصابه ودمه يغلي في حقد على الليبيين وبطنه تجري ليل نهار وقاعد ينسرف وهارب من حفره لحفره وخايف من اللي قالوله لا وخايف من البوليس الدولي وخايف حتى من ظله ومن صغاره ومعادش قادر يثق في اي حد..
ان تصبح مدمن للارهاب والتسلط والمهدئات ومدمن على قيادة كتائب ارهاب الليبيين واغتصاب الليبيات وموزع فردي مدمن على تسجيل خطابات الصوت المبحوح على اشرطة تسجيل لتزرع الفتنة والموت والدمار بين ليبيين اعطوك 42 من عمرهم ودمهم ورزقهم..
ان تكتشف هذا كله وتحس باللي درته معناها انك عرفت روحك: انت معمر القذافي!
أنت معمى القذافي عدو الشعب الليبي رقم واحد والاب الروحي لكل القتل والدمار اللي صاير اليوم في ليبيا! معمر القذافي "الرمز"!
أنت معمر القذافي "الرمز".. رمز الظلم وفقر الليبيين والارهاب والقتل بدون محاكمات والخنبه والنهب.. رمز العنطزة والفساد ورفعة الخشم على الشعب الليبي.. رمز "التصفية الجسدية" لليبيين في اوروبا.. نعم فأنت معمر القذافي "الرمز".. رمز ضياع عشرات الآلاف من شباب ليبيا في حروب تشاد وأوغندا.. رمز تدمير التعليم والصحة وتحطيم الشخصية الليبية وتكبيلها.
نعم فأنت معمر القذافي "الرمز.. رمز ارهاب اللجان الثورية ورمز حقن اطفال مستشفى بنغازي بفيروس الايدز.. ورمز بيع سمعة ليبيا دوليا.. معمر القذافي الرمز.. رمز المذلة والشعوذة والدجل والكذب على الجماهير.. معمر القذافي رمز نهب ارزاق الليبيين وارسالها للافارقه وجنوب آسيا وأمريكا.. معمر القذافي رمز السابع من ابريل الدموي.. معمر القذافي رمز الكذب في عز القايله.. معمر القذافي رمز ضياع اربعة عقود من عمر الوطن والمواطن كان يمكن خلالها بناء دولة عصرية ومتحضرة.
اللي يتابع التصرفات والكلام المتهور والصوت المبحوح والشكل اللي واضح منه ان هذا "الرمز" ناقصه توازن نفسي ومش قادر يرقد كويس من يوم 17 فبراير، كل التصرفات والافعال والقذاف اللي طالع من هالمخلوق، الواحد ممكن يقدر يفهم منهن ان بالفعل هو هذا معمر القذافي "الرمز" اللي عرفناه وللاسف من 1 سبتمبر 1969 ونتوقعو منه اي شئ بطّال.. وسبب انفعاله ونرفزته واعصابه المحروقه والرعشه الباينه في صوته سببها هي ان الشعب الليبي فجأه جبد من تحت كرعيين العسكرسوسه القذافي البساط بدون استئذان وبدون موافقه منه والراجل فجأه لقى كتاباته وتصاويره وكل ما يرمز ليه ولعيلته ولفترة حكمه لقاهن كلهن متشوشه فيهن النار.. ولمّا السفاح فاق من الصدمه والكالشو وفتح عيونه ما قدرش يصدق ان الليبيين دارو فيه هكي وتشجعو وقلبو فوق راسه الطاوله (هذا عقابها زي ما قال في خطابه) ومزقو تصاويره وخرقته الخضرا وحرقو مقولاته وهتافاته وشعاراته الفارغه ودفلو علي تصاويره وقالوله بالفم المليان: لعنة الله على هاضاك اليوم الاسود اللي سمعنا فيه صوتك وسمعنا بيك لاول مره.. الراجل ضاعت منه الخريطه وصار متلخبط ومستعد انه ايدير اي حاجه بيش امّا ترجعله ايام العز والعنطزه او يقلبها فوق روص كل الليبيين وينتقم منهم لأنه في النهايه عارف روحه انه حيخسر المعركه.
فيا معمر.. أن تكتشف ان فيشطة " الشرعية الثورية" تمت ولاعاد فيه فلوس ليك ولصغارك وأن تكتشف ان كل الهيبه والهيلمان اللي درته لروحك بفلوس الليبيين معادش يساوي حتى كيلو فحم عند الليبيين لأنك طحت من عيونهم للمره الاخيره ومس حتقدر تصلّح اللي انكسر ومش حتقدر تبنج الليبيين مرة ثانيه او تضحك عليهم.. ولمّا تكتشف أن كل محاضراتك ومداخلاتك وخطاباتك وكتاباتك ومقولاتك وتوصياتك وهتافاتك طلعت كلها طر فش وصفر عالشمال وما تساويش اي شئ وصارت كلها بالنسبة لليبيين ترمز لأسود وأبشع وأشنع فترة حكم عرفتها ليبيا.. تقدر تلقط وريقاتك وخربشاتك وخطاباتك وكتاباتك ومقولاتك بيش تمسح بيهن"جبهتك" او تبلّهن وتشرب اميتهن وانت ريقك ناشف من يوم ما بدت الثورة الليبية الحقانيه ثورة الشعب المزبوطه في 17 فبراير وتوجه مسدسك لجبهتك وتطلق على روحك رصاصة الرحمة وتريحنا من شرك وتفكنا من الاستمرار في هالمسلسل التراجيدي اللي فرضته علينا.. وهادي حتكون اكبر انجاز ممكن تقدمه للشعب الليبي والعالم كله.. ديرها وريّح روحك وريّحنا يا.. ."رمز"!
ولليبيين الشرفاء.. تمسو على خير.
ولد بلاد
ليست هناك تعليقات:
إرسال تعليق