الى كل من عرف اقدوره حموده
الى جميع أحبائه وأصدقائه ورفاقه
عزا فى اقدوره يالصحاب
علينا غاب
اليوم توارى تحت تراب
****
عزا ونديب
عزا ونديب
على الصّاحيب
اللى ما عاد اليوم قريب
اللى خلف دمع وتسكيب
رجانا خاب
طويناه اسكّر لكتاب
****
عزا وعياط
عزا وعياط
على بوكاط
دلال إلا دقره وحلاط
اللى حارب مشروط الباط
اللى ما هاب
كتايب تجرجر واعطاب
****
عزا وحداد
على النشّاد
لذيذ المقعد والميعاد
اللى أصلى وأوليد بلاد
وما ينعاب
جميله قاعد فى لرقاب
****
عزا ونكد
ويوم أسود
على قدوره عدى ما ردّ
عليه ادموعى مالا حدّ
وما ينجاب
افراقه تما لى شخشاب
****
عزا وابكا
وزاد اشلا
على اقدوره عدّى ما جا
اللى كرسيه اليوم فضا
وطاح الكاب
اللى كان مجمع لحباب
****
عزا وغريد
امعا تنهيد
على الشيخ الحر الصنديد
اللى خش اجونه وهويد
العزة جاب
فخر حصّل من غير حساب
****
عزا وعويل
بلا تبطيل
اعياط وجضّة وتولويل
على هللى ف الناس قليل
اللى رحاب
المتبسّم ضحّاك الناب
****
عزا ونوض
وما ينفضّ
على خى أسامة وعوض
الصادق من فرقاه امرض
وفيصل شاب
على صاحب باهى شرهاب
****
عزا وأحزان
ملن لوطان
ملن لوطان
على خى حميده زيدان
اللى استشهد وسط الميدان
هزم لذناب
خذا مكانه سحاب
****
عطاه الله
ونال امناه
اسجّل فى التاريخ اسماه
وعقب بو موسى لضناه
المجد اثواب
هزم بوشفشوفه الكذاب
فتحى عبد الله بالتمر
أكتوبر 2011
ليست هناك تعليقات:
إرسال تعليق